Жаңалықтар

11 қаңтар 2006
Мемлекет басшысы Нұрсұлтан Назарбаев «Ақорда» сарайында Қазақстан Республикасы Президентінің лауазымына ресми кірісу рәсіміне қатысуға келген бірқатар шетелдік қонақтарды қабылдады.

Жапония Парламенті сыртқы саясат жөніндегі комиссиясының төрағасы Нобутака Мачимурамен болған кездесуде екіжақты ынтымақтастық және «Орталық Азия - Жапония» көпжақты үнқатысуы шеңберіндегі сауда-экономикалық өзара қарым-қатынас мәселелері қаралды.  
- Біз Президент мырзамен біздің елдеріміз арасындағы сауда-экономикалық қарым-қатынастарды одан әрі дамытудың болашағы жөнінде пікірлесіп, биылғы жылдың наурызында Астанада экономика мәселелері бойынша Қазақстан-Жапония бірлескен отырысын өткізу туралы ниетімізді нақтыладық. Жапония Қазақстанды өңірдегі ең маңызды әрі келешегі зор әріптес ретінде санайды, - деп атап өтті Нобутака Мачимура журналистерге арналған брифингте.

Испанияның Сыртқы істер министрі Мигель Анхель Моратинос Мемлекет басшысын Король Хуан Карлос І-нің атынан құттықтап, оның екіжақты қарым-қатынастардың одан әрі дамитынына үміт білдірген хатын тапсырды.  
- Испан Үкіметі Қазақстанды Орталық Азия өңірінің басқа да елдерімен қарым-қатынастарды дамытудың тұғыры ретінде қарастырады, - деп атап көрсетті Испания сыртқы саясат ведомствосының басшысы.

АҚШ-тың Ауыл шаруашылығы министрі Майк Йоханнспен болған кездесуде екі ел арасындағы экономика және ауыл шаруашылығы салалары бойынша қарым-қатынастарды тереңдету мәселелері талқыланды.  
- Ауыл шаруашылығы министрі ретінде мен Қазақстанға келіп, ауыл шаруашылығының даму барысына баға беретін америкалық компаниялар өкілдері енген жұмыс тобын құру жөнінде мүмкіндіктің бар екенін атап көрсеттім, - деді М.Йоханнс.

Министр сондай-ақ «Қазақстанның Орталық Азия өңірінде атқарып келе жатқан көшбасшылық әрі тұрақтандырушы рөлін» атап көрсетті.  
- Бізде Қазақстанмен екіжақты оң өзара қарым-қатынас қалыптасты. Бірнеше жылдардан бері біз біртұтас мәселелер, әсіресе қауіпсіздікті қамтамасыз етуге байланысты мәселелер бойынша қоян-қолтық жұмыс істедік. Қазақстанның қолдау көрсетуі біз үшін аса маңызды және ол қолдаудың көрсетілгеніне біз ризашылық білдіреміз, - деп атап көрсетті ол.


Барлық жаңалықтар
 
Басқа жаңалықтар
Барлық жаңалықтар