National Emblem of Kazakhstan

Қазақстан Республикасы Президентінің

ресми сайты

Қазақстан Республикасы Президентінің

ресми сайты

Жаңалықтар


Халықаралық қоғамдастық

Еліміздегі қайғылы жағдайға байланысты Қазақстан Президентінің атына келіп түскен көңіл айту жеделхаттары

2022 жылғы 12 қаңтар

Қазақстандағы қайғылы оқиғалар кезінде көптеген адамның қаза болуына байланысты Қасым-Жомарт Тоқаевтың атына шет мемлекеттердің басшыларынан, халықаралық құрылымдардың өкілдерінен көңіл айту жеделхаттары келіп жатыр.

ҚХР Төрағасы Си Цзиньпин жеделхатында Қасым-Жомарт Тоқаевтың мемлекет үшін шешуші сәтте жағдайды жедел өз бақылауына алып, батыл әрі нақты шаралар қабылдағанын жазған.

– Осыдан Сіздің саясаткер және еліңіз бен халқыңыздың алдында зор жауапкершілік арқалаған тұлға ретіндегі ерлігіңіз көрінеді. Мен мұны жоғары бағалаймын! Қытай тарапы Қазақстанның тұрақтылығына нұқсан келтіретін, оның қауіпсіздігіне қауіп төндіретін, Қазақстан халқының тыныштығын бұзатын кез келген күштерге және Қазақстанда саналы түрде хаос туғызып, «түрлі-түсті революция» жасайтын сыртқы күштерге батыл қарсы шығады. Қазақстан мен Қытай арасындағы достыққа сына қағуға және екіжақты ынтымақтастыққа кедергі келтіруге тырысатын кез келген әрекетке батыл қарсы тұрады, – делінген Қытай Төрағасының жеделхатында.

Өзбекстан Президенті Шавкат Мирзиёев өзінің хатында Қасым-ЖомартТоқаевқа және Қазақстан халқына көңіл айтып, еліміздегі бейбітшілікті сақтау жолында қаза тапқан қайсар ұландардың жақындары мен туыстарының қайғысына ортақтасатын айтқан.

– Бауырлас Қазақстанда бейбітшілік пен тұрақтылықты қамтамасыз ету жолындағы Сіздің батыл күш-жігеріңізді толық қолдайтынымызды тағы да нақтылағым келеді, – делінген Өзбекстан көшбасшысының жеделхатында.

Қырғызстан Президенті Садыр Жапаров жолдаған жеделхатында Қазақстанда болған қайғылы оқиғаларды зор күйзеліспен қабылдағанын атап өтіп, Қырғызстан халқының және жеке өзінің атынан Мемлекет басшысы Қасым-Жомарт Тоқаевқа және қазақ халқына көңіл айтқан.

– Мызғымас достық, тату көршілік және өзара сыйластыққа негізделген халықтарымыздың көп ғасырлық ортақ тарихи, рухани және мәдени байланыстарын ескере отырып, Қырғызстан Қазақстан Республикасын қашанда ниеттес, сенімді көрші әрі стратегиялық әріптес ретінде қолдайды, – делінген Қырғызстан басшысының жеделхатында.

Беларусь Президенті Александр Лукашенко көптеген адамның құрбан болуына және ғимараттардың қирауына әкеп соқтырған  содырлар тобының елімізге жасаған шабуылы халықаралық терроризмнің әлемге зор қауіп төндіретінін тағы да көрсетті деп жазған.

– Экстремистердің түпкі мақсаты – көпұлтты Қазақстандағы жағдайды тұрақсыздандыру, елде хаос орнатып, конституцияға қарсы төңкеріс жасау және саяси бағдарды өзгерту үшін бауырлар арасында соғыс отын өршіту екені айқын, – деп жазды Беларусь басшысы.

Тәжікстан Президенті Эмомали Рахмон және Түрікменстан Президенті Гурбангулы Бердімұхамедов, сондай-ақ БҰҰ Өркениеттер Альянсының Жоғарғы Өкілі Мигель Анхель Моратинос және басқа да тұлғалар қолдау білдіріп, көңіл айтты.

Жеделхаттар әлі де келіп түсуде.

 

 


Кері қайту Кері қайту Twitter Facebook Басып шығару
Tokaev

Қазақстан Республикасы Президентінің