Отырысты ашқан Мемлекеттік хатшы қазақстандық патриотизм мен халық бірлігі Мемлекет басшысы ұсынған бес институционалдық реформаны кезең-кезеңімен іске асырудың және «100 нақты қадамды» өмірге табысты енгізудің маңызды факторы екенін атап өтті. Г.Әбдіқалықова қазақстандық патриотизм ең әуелі Отанға деген сүйіспеншілік пен оның мемлекеттік рәміздеріне деген құрмет арқылы орнығатынын атап көрсетті. Комиссия отырысында Қорғаныс, Денсаулық сақтау және әлеуметтік даму министрліктерінің, сондай-ақ, Астана қаласы және Атырау облысы әкімдерінің есептері тыңдалды. Аталған орталық және жергілікті мемлекеттік органдардың осы маңызды идеологиялық саладағы жұмысына жан-жақты әрі терең талдау жасалды. Мемлекеттік хатшы уәкілетті мемлекеттік органдар басшыларының назарын мемлекеттік рәміздер туралы заңнамалардың бұзылуына жол бермеу, ішкі бақылауды ұдайы қамтамасыз ету, құқық қолдану тәжірибесін жетілдіру, сондай-ақ мемлекеттік рәміздерді қолдану мен насихаттау саласын бақылауды күшейту мәселелеріне аударды. Отырыс қорытындысы бойынша нақты тапсырмалар мен ұсынымдар берілді.