Бөлімдер санаты

Жаңалықтар

29 қараша 2017
Қазақстан Президенті Беларусь Республикасының Президенті Александр Лукашенкомен кездесті
Беларусь Республикасы, Минск қаласы, Тәуелсіздік сарайы

Мемлекеттер басшылары ресми кездесу рәсімінен соң шағын құраммен келіссөз жүргізді.

Нұрсұлтан Назарбаев Минск қаласына ресми сапармен келуге шақырғаны үшін Александр Лукашенкоға ризашылық білдіріп, бұл сапар екі ел арасындағы дипломатиялық қарым-қатынастың 25 жылдығы қарсаңында өтіп отырғанын айтты.

Мемлекет басшысы Қазақстан мен Беларусь арасындағы байланыстардың тарихи тұрғыдан орныққан достық сипаты бар екенін атап өтті.

– Тарихи тұрғыдан қысқа уақыт ішінде айтарлықтай жетістіктерге қол жеткіздік. Біз қиын жағдайларда екіжақты ынтымақтастықтың мықты саяси базасын құрдық. Мемлекеттеріміз ашық әрі сенімді қарым-қатынастағы берік әріптес болып саналады, – деді Қазақстан Президенті.

Нұрсұлтан Назарбаев биылғы Қазақстан мен Беларусь арасындағы сауда-экономикалық ынтымақтастығының даму қарқынына оң баға берді.

Сондай-ақ, Мемлекет басшысы ортақ интеграциялық бірлестік – Еуразиялық экономикалық одақ аясындағы Қазақстан мен Беларусьтің экономикалық тұрғыдан өзара тығыз іс-қимыл жасап отырғанына тоқталды.

– Қазақстанда Беларусь Республикасының 260 кәсіпорны, бірлескен ірі 6 автомобиль құрастыру зауыты жұмыс істейді. Еліміздегі дүкендер сөрелерінде Беларусьтің ауыл шаруашылығы өнімдері сатылуда, – деді Мемлекет басшысы.

Александр Лукашенко Қазақстан Президентінің бұл сапары екіжақты ынтымақтастықты одан әрі нығайту тұрғысынан маңызды екенін атап өтті.

– Сіздің бүгінгі сапарыңыз елдеріміздің тауар айналымын арттыруға серпін беретініне сенімдімін. Ол үшін біздің мүмкіндіктеріміз зор, – деді Беларусь Республикасының Президенті.

Кездесу соңында мемлекеттер басшылары бүгін қол қойылатын құжаттар Қазақстан мен Беларусь арасындағы қарым-қатынасты одан әрі нығайтуға септігін тигізетініне сенім білдірді.


Барлық жаңалықтар
 
Өзге де шетелдерге сапарлар
Барлық шетелдерге сапарлар